Rom 12 | KMU | STEP | NafuꞋnaganagatama Anumaya KotiꞋa kalagi ailatea yafena haviꞋna tokiyaꞋage ke lamahanepauve. Anumaya Kotife muse yaꞋamima sipi sipi heꞋya aminaya kava hutama tamahaimula hanenagetama muse yana tamaugafa Anumaya Kotina amiho. Agaila alu aotage veaꞋneꞋagitama Anumaya Kotina haisia kava hisayana fatago lamaku tamakesafiti Anumaya Koti agia alisaga hugahae.

Romans 12

Tagaya Anumaya Kotina taugafa muse ya kana huta amisune.

1 NafuꞋnaganagatama Anumaya KotiꞋa kalagi ailatea yafena haviꞋna tokiyaꞋage ke lamahanepauve. Anumaya Kotife muse yaꞋamima sipi sipi heꞋya aminaya kava hutama tamahaimula hanenagetama muse yana tamaugafa Anumaya Kotina amiho. Agaila alu aotage veaꞋneꞋagitama Anumaya Kotina haisia kava hisayana fatago lamaku tamakesafiti Anumaya Koti agia alisaga hugahae. 2 Tamakaya ma mopafi veaꞋmoꞋya nehaya augafa kavala ohutama lamaku tamakesa aiyahae hageno Anumaya KotiꞋa yaufa lamaku tamakesa tamamineafe agaiꞋma nehaiya kavafena havilama hutama havigahae. Ani kavala kanale yane. MukiꞋa yamona ago agaseno kosa hetenea ya hane.

Anumaya KotiꞋa muse ya taminea yamaꞋaleti aliꞋyana alisune.

3 Anumaya KotiꞋa agaiꞋa kayone yamaꞋaleti aliꞋyamaꞋa namineafe nagoke nagokeꞋmogatamina tamahanepauve “Anumaya KotiꞋa naꞋa yama namine.” huka haviteka kagaika kaugafa alika ohaiyo. Anumaya KotiꞋa agaiꞋalefe havitama tamakupi maletama tamametiti humainaya yana nagoke nagokeꞋmogatamina ala yano osi yano afaꞋa tamamineafe fatago lamaku tamakesa havitetama lamakaitami fako hiho. 4 Nagoke taugafamoꞋagi alagate alagate taugafa haneno alu aliꞋya alu aliꞋyana neꞋaliye. 5 Tagaya mukiꞋa veaꞋmogata ani kava huta KalaisiꞋene aigaꞋmaeta agai augafa nagoke maineta afalu falu huta nagoke mainone. 6 Mainonageno Anumaya KotiꞋa kayone hulateno muse yatia haote haote huno agaiꞋa aliꞋya alisuna tokiyatia ago tamine. NagoꞋa veaꞋmogamina Anumaya KotiꞋa avayafiti hamapai-mainea kea huhaleꞋya hisaya tokiya muse hunoꞋma amaminesiana Yisasife haviꞋya amakupi maleꞋya amametiti humainaya keꞋage huhaleꞋya hamapaisae. 7 NagoꞋa veaꞋmogamima muse yama amafu-amakanagami amaya hisaya tokiyama amaminesia aliꞋyana aliꞋya tokiya vaisae. NagoꞋa veaꞋmogamina veaꞋne humaveli hamaveli hisaya tokiyama amaminesiana ali lokiya vaiꞋya humaveliho. 8 NagoꞋa veaꞋmogamina vea amaku amakesa ali hetimatesaya tokiyama amaminesiana ali tokiya vaiꞋya ani amaku amakesa ali hetimatesae. “NafuꞋnaganagamima nago yama amamigahue.” huno humainesia tokiyama amaminesiana kasagoꞋya male kosa heꞋya amamiho. Kava aliꞋya alisaya tokiyama amaminesiana amakuꞋaleti ani kava aliꞋyana aliꞋya maiho. Hauma huteno afuꞋaganama ayama hisia tokiyama amaminesiana amaipa falu yapiti amaya hiho.

Tafu-taganagamina tamage huta taguꞋa amamisuna ke humaine.

9 Tamafu-tamakanagamima tamakuꞋa amamigahena tamagelafa hutama amamiho. Kefo kavala tamakaveꞋno hutetama kanale kava hisaya yamaꞋage atafa hutama tokiya vaiho. 10 Tamafu-tamakanafema aluya huno tamahaisigetama tamakuꞋa amamiho. Nagoke nagokeꞋmogatama tamafu-tamakanagami amakia alisaga hutama “Hagoteho.” hutama humateho. 11 MukiꞋa kanafina aliꞋyageꞋya neꞋalisagetama kasalo kasala kea ohiho. Tamakupina Alu Aotage AvamuꞋmo tokiyaꞋaleti tamakaila ali hetinagetama Anumayamo aliꞋyana aliho. 12 Muse nehutama AnumayamoꞋma hulatesia yafena tamametiti hutama agava maiho. Kana yama falote hisigetama hetitama tokiya vaiho. MukiꞋa kanafina Anumayamotega havige havige hutama maiho. 13 Anumaya Koti anagaꞋmogamima nagoꞋa yaꞋamimoꞋma kosa heoꞋamatesigetamahena amaya hiho. Natu veaꞋma esagetama ali kayone hutama amateho.

14 NagoꞋa veaꞋmoꞋya ali haviya hulamatesagetama “Ani veala alika kanale humato.” hutama Anumaya Kotitega havigeho. “Alihaviya humato.” hutama haviokeho. 15 NagoꞋa veaꞋmoꞋya kigi yokalo huꞋya maisagetama tamakaiꞋenena aniꞋa hutama maiho. NagoꞋa veaꞋmoꞋya avima atesagetama tamakaiꞋenena aniꞋa hutama avia ateho. 16 Tamafu-tamakanagamiꞋenena nagoke tamaku tamakesale maiho. “Ala vaya mainone.” hutama ohutama afa veaꞋnene vaiyatete hiho. “NagaiꞋnige kanale nagu nagesa hane.” hutama ohiho.

17 NagoꞋa veaꞋmoꞋya havi kavaꞋma hulamatesagetama anonaꞋa havi kavala hu oꞋamateho. MukiꞋa veaꞋmogami amaufina kanale kavakeꞋya hiho. 18 Tamakaitamia tuma hisaya yafena tamakesa ohavitafa hutama mukiꞋa veaꞋnenena yuna hetama maiho. 19 Nahaumainea nafuꞋnaganagatama tamakaiꞋma havi yama hulamatesaya anonaꞋa “Ani kavala humategahune.” hutama ohiho. Anumaya KotiꞋa ani yama haya kavala agaiꞋa anonaꞋa amamisiafe maitama haleho. Anumaya Koti avopina mage huꞋya kae-malenayane

AnumayamoꞋa mage huno humaine “Havi kavaꞋma humatesaya anonaꞋa amakata aisia yana amamisua yana nagaiꞋni aliꞋyane.” huno humaineane.
20 Havi yamo anonaꞋa oꞋamamigahagi Anumaya Koti avopina mage huꞋya kae-malenayane

Kame vayatamimogamima amakatesigetama kavela afaꞋa amamiho. Tifema amakesigetama tina afaꞋa amamiho. Na kava hutama ali kayonema humatesageꞋya amakaye hinageꞋya atalegahae huno humaineane.
21 Atalesanageno havigu havi yamoꞋa katafa huyafenagi kanale yamaꞋage hugeno ani havi yamona agaseno.